ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމް، ނޭޝަނަލް އިންޓެގްރިޓީ ކޮމިޝަނުގެ މެންބަރުން 2015 އޮކްޓޯބަރ 15 ވަނަ ދުވަހު ޢައްޔަންކުރުމާއެކު، އަލްފާޟިލް މުޙައްމަދު ފަރުޙާދު ކޮމިޝަނުގެ ރައީސްކަމުގެ ފަސް އަހަރުގެ ދައުރަށް ހަމަޖެއްސެވިއެވެ.

ނޭޝަނަލް އިންޓެގްރިޓީ ކޮމިޝަނުގެ ރައީސްކަމަށް ޢައްޔަންވުމުގެ ކުރިން 2014 އޮގަސްޓް 13 އިން ފެށިގެން މަސައްކަތް ކޮށްފައިވަނީ ޕޮލިސް އިންޓެގްރިޓީ ކޮމިޝަނުގެ ނައިބު ރައީސްގެ މަޤާމުގައެވެ. އެމަޤާމަށް ހަމަޖެއްސެވުމުގެ ކުރިން މިނިސްޓްރީ އޮފް ފޮރިން އެފެއަރޒްގައި ގިނަ ދުވަސްތަކެއްވަންދެން މަސައްކަތް ކުރައްވާފައިވެއެވެ.

ފަރުހާދު ޤަސްދުކުރައްވާފައިވަނީ، ބައިނަލް އަޤްވާމީ ގުޅުންތަކުގެ ދާއިރާއިންނާއި ސަރުކާރުގެ ދާއިރާއިން އެބޭފުޅާއަށް ލިބިވަޑައިގެންފައިވާ ތަޖުރިބާގެ ބޭނުންފުޅު ކުރައްވައިގެން ޤައުމަށް އިތުރު ޚިދުމަތްތަކެއް ކުރެއްވުމަށެވެ. މިގޮތުން، ދޭދޭ ގުޅުންތައް ދެމެހެއްޓުމާއި، ނާޒުކު މައްސަލަތައް ހައްލުކުރުމުގެ ހުނަރާއި، ތަޖުރިބާގެ ބޭނުންފުޅުކުރައްވާ، ޤައުމުގައި އުފެދިފައިވާ ސިޔާސީ ޚިޔާލުތަފާތުވުންތަކާއި ގުޅިގެން ޤާނޫނު ތަންފީޒުކުރާ ފަރާތްތަކާ ޢާންމު ރައްޔިތުންގެ މެދުގައި އުފެދިފައިވާ ނުތަނަވަސްކަން ފިލުވާލާ ހަމަޖެހުން ޤާއިމްކުރުމަށް މަސައްކަތް ކުރެއްވުމަށެވެ.

ފަރުހާދަކީ، އިސްލާމިކް ޔުނިވަރސިޓީ އޮފް މެލޭޝިޔާ (އައި.އައި.ޔޫ.އެމް) އިން މާސްޓަރ އޮފް ހިއުމަން ސައިންސަސް (ޕޮލިޓިކަލް ސައިންސް) ޙާޞިލްކުރައްވައި، ޚާރިޖީ ދާއިރާގައި 19 އަހަރުގެ ތަޖުރިބާ ލިބިލައްވާފައިވާ ބޭފުޅެކެވެ. އަދި "ޕޮލިޓިކަލް ޓްރާންސްފޮމޭޝަން އިން ދަ މޯލްޑިވްސް: 2003-2009: އެން އެނަލިސިސް" ގެ ނަމުގައި ލިޔުއްވާފައިވާ ތީސިސް ޝާއިޢުކޮށްފައިވެއެވެ.

ބައިނަލްއަޤްވާމީ ފެންވަރުގައި އިންޓަރ ގަވަރމެންޓަލް ރިލޭޝަންސް އާ މުއާމަލާތް ކުރުމުގެ ޤާބިލްކަމާއެކު ޚާރިޖީ ދާއިރާއިން ލިބިފައިވާ ތަޢުލީމާއި ތަޖުރިބާ ލިބިފައިވެއެވެ.

ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމް، ނޭޝަނަލް އިންޓެގްރިޓީ ކޮމިޝަނުގެ މެންބަރުން 2015 އޮކްޓޯބަރ 15 ވަނަ ދުވަހު ކޮމިޝަނުގެ މެންބަރުކަމަށް ޚަދީޖާ ޢަބްދުﷲ ފަސް އަހަރުގެ މުއްދަތަށް ޢައްޔަންކުރެއްވިއެވެ.

ނޭޝަނަލް އިންޓެގްރިޓީ ކޮމިޝަނުގެ މެންބަރުކަމަށް ޢައްޔަން ވުމުގެކުރިން 2004 އިން ފެށިގެން މަސައްކަތް ކޮށްފައިވަނީ މޯލްޑިވްސް ޕޮލިސް ސަރވިސް (އެމް.ޕީ.އެސް) ގައެވެ. މޯލްޑިވްސް ޕޮލިސް ސަރވިސް ގެ ގަވާއިދުތަކާއި، އުސޫލުތަކާއި އަމުރުތައް ޑްރާފްޓްކޮށް، މަދަނީ މައްސަލަތަކުގައި ދަޢުލަތުގެ ވަކީލާއެކު ކޯޓުތަކުގެ އަޑުއެހުންތަކުގައި މައްސަލަތަކާ ގުޅޭގޮތުން ބައިވެރިވެ ވަކާލާތު ކޮށްފައިވެއެވެ. މީގެއިތުރުން ޕޮލިސް އިންޓެގްރިޓީ ކޮމިޝަނުންނާއި، ހިއުމަންރައިޓްސް ކޮމިޝަނުން ފުލުހުންނާ ގުޅިގެން ތަޙުޤީޤުކުރާ މައްސަލަތަކާ ގުޅޭގޮތުން ފުލުހުން ޢަމަލުކުރާނެ ގޮތާ ބެހޭގޮތުން މަޝްވަރާ ދެއްވައެވެ. އަދި 2014 އިން 2015 އަށް އެމް.ޕީ.އެސް ގެ ޑިސިޕްލިނަރީ ބޯޑުގެ މެންބަރުކަން ކުރައްވާފައިވެއެވެ.

ޚަދީޖާ ވަނީ މޯލްޑިވްސް ކޮލެޖް އޮފް ހަޔަރ އެޑިއުކޭޝަން ( މިހާރުގެ ޤައުމީ ޔުނިވަރސިޓީ) އިން ބެޗްލަރސް އޮފް ލޯ (އެލް.އެލް.ބީ) ޚަޞިލުކޮށްފައެވެ. އަދި ވިލާ ކޮލެޖުން މާސްޓަރސް އޮފް އިސްލާމިކް ޝަރީޢާ ފުރިހަމަ ކޮށްފައެވެ.

ޚަދީޖާ ޤާނޫނީ ދާއިރާއަށް އެންމެ ފުރަތަމަ ނިކުންނެވީ ޕްރިމިއަރ ޗެމްބަރސް ބެރިސްޓަރސް އެންޑް އެޓަރނީސް ގައި ލީގަލް އެސިސްޓެންޓެއްގެ ގޮތުގައެވެ. އަދި އެމް.ޕީ.އެސް ގެ ވަޒީފާގައި މަސައްކަތް ކުރެއްވުމުގެ ކުރިން މިނިސްޓްރީ އޮފް ޑިފެންސްގެ ލީގަލް އެސިސްޓެންޓެއްގެ ގޮތުގައިވެސް މަސައްކަތް ކޮށްފައިވެއެވެ.

ނޭޝަނަލް އިންޓެގްރިޓީ ކޮމިޝަނުގެ މެންބަރުކަމަށް ކުރިމަތިލެއްވުމަށް ޚަދީޖާ ޝައުގުވެރިވެލެއްވީ، ޤާނޫނު ތަންފީޒުކުރާ އިދާރާތަކުގެ މަސައްކަތް ހިނގަމުންދާގޮތާއި، އެ ތަންތަނުގައި ހިނގާ ނޭދެވޭކަންތައްތައް ނައްތާލުމަށާއި، އެފަދަކަންތައްތަކާ ދެކޮޅަށް ސްޓްރެޓަޖީތައް އެކުލަވާލުމުގައި މޯލްޑިވްސް ޕޮލިސް ސަރވިސްގައި އެކަމަނާއަށް ލިބިވަޑައިގެންފައިވާ ތަޖުރިބާއިން އެން.އައި.ސީ.އަށް ފައިދާކުރާނެކަމަށް ދެކެވަޑައިގަންނަވާތީއެވެ.

ނޭޝަނަލް އިންޓެގްރިޓީ ކޮމިޝަނުގެ މެންބަރުކަމަށް 15 އޮކްޓޯބަރ 2015 ވަނަ ދުވަހު އަލްއުސްތާޛް ޙައްސާން ޙަމީދު ފަސްއަހަރުގެ މުއްދަތައް ޢައްޔަންކުރެއްވިއެވެ. އަލްއުސްތާޛް ޙައްސާން ޙަމީދު 21 ޑިސެމްބަރ 2016 ގައި ނޭޝަނަލް އިންޓެގްރިޓީ ކޮމިޝަންގެ ނައިބު ރައީސްކަމަށް ޢައްޔަންކުރެވުނެވެ.

ނޭޝަނަލް އިންޓެގްރިޓީ ކޮމިޝަނުގެ މެންބަރުކަމަށް ޢައްޔަން ވުމުގެކުރިން ޕްރައިވެޓް ސެކްޓަރގައި ޤާނޫނީ ވަކީލުކަން ކުރައްވާފައިވެއެވެ.

މަސައްކަތުގެ ދާއިރާގައި ދިވެހިރާއްޖޭގެ އެންމެ ބޮޑު ވިޔަފާރި ކުންފުނި ކަމަށްވާ ސްޓޭޓް ޓްރޭޑިންގ އޯގަނައިޒޭޝަނާއި، ފުޓްބޯލް އެސޯސިއޭޝަން އޮފް މޯލްޑިވްސްގައިވެސް ޤާނޫނީ ވަކީލެއްގެ ޙައިޞިއްޔަތުން މަސައްކަތް ކުރައްވާފައިވެއެވެ.

ޙައްސާން މަސައްކަތުގެ ދާއިރާއަށް އެންމެ ފުރަތަމަ ނިކުމެވަޑައިގަތީ ސިފައިންގެ މީހެއްގެ ގޮތުގައެވެ. ޤާނޫނީ ދާއިރާއަށް ވަދެވަޑައިގަތީ ސިފައިންގެ މިލިޓަރީގައި ހުންނަވައިގެން ލިބުނު ފުރުސަތެއްގައި ކޮލެޖް އޮފް އިސްލާމިކް ސްޓަޑީސް އިން 2008 ވަނަ އަހަރު ބެޗްލަރސް އޮފް ޝަރީޢާ އެންޑް ލޯ އިން ޑިގްރީ ޙާޞިލު ކުރައްވައިގެންނެވެ.

ކުރިން ސިފައިންގެ މީހެއްގެ ގޮތުގައި މަސައްކަތް ކުރުމުގެ ސަބަބުން، ނުފޫޒުތަކުން އެއްކިބާވެ ހުރެ ރިވެތި އަޚްލާޤާއި، ނަޒާހާތްތެރިކަމާއެކު މަސައްކަތް ކުރުމުގެ ޤާބިލުކަން ޙައްސާނަށް ލިބިފައިވެއެވެ.

ނޭޝަނަލް އިންޓެގްރިޓީ ކޮމިޝަންގެ މެންބަރުކަމަށް އަލްފާޟިލް އަޙްމަދު އަމީން ހަމަޖައްސަވާފައިވަނީ 08 މާރިޗު 2016 ގައެވެ.

އޭގެ ކުރިން އެމަނިކުފާނު ހުންނެވީ ދިވެހިރާއްޖޭގެ އެންޓި ކޮރަޕްޝަން ކޮމިޝަން (އޭސީސީ) ގެ އިންވެސްޓިގޭޝަން އޮފިސަރެއްގެ މަޤާމުގައެވެ. އަދި، އެ އޮފީހުގައި މަސައްކަތްކުރެއްވިއިރު އިންވެސްޓިގޭޝަން ޓީމްގެ "ޓީމް ލީޑަރ" އެއްގެ ގޮތުގައި މަސައްކަތްކޮށްފައިވެއެވެ.

އޭސީސީގައި މަސައްކަތްކުރެއްވިއިރު އެމަނިކުފާނު ވަނީ ރާއްޖެއާއި ރާއްޖޭން ބޭރުން ތަޙުޤީޤުކުރުމާ ބެހޭ އެކިއެކި ތަމްރީންތައް ހޯއްދަވާފައެވެ.

އޭސީސީއާ ގުޅުމުގެ ކުރިން 2008 ވަނަ އަހަރު މޯލްޑިވްސް ކަސްޓަމްސް ސަރިވސްގެ ޗީފް ކަސްޓަމްސް އޮފިސަރެއްގެ ވަޒީފާ އަދާކުރައްވާފައިވެއެވެ. އަދި، މޯލްޑިވްސް ކަސްޓަމްސް ސަރވިސްއަށް ޚިދުމަތްކުރެއްވެވިއިރު، އެމަނިކުފާނު ވަނީ 3 އަހަރުވަންދެން އެ ސަރވިސްގެ އެއަރ ކާގޯ ޑޮކިއުމަންޓޭޝަން ސެކްޝަން އަދި އެއަރ ކާގޯ އެގްޒެމިނޭޝަން ސެކްޝަންގެ އޮފިސަރ އިންޗާޖްއެއްގެ މަޤާމް އަދާކުރައްވާފައެވެ.

އަލްފާޟިލް އަޙްމަދު އަމީން ވަނީ 2007 ވަނަ އަހަރު މިޞްރުގެ އަލްއަޒްހަރު ޔުނިވަރސިޓީން އެކައުންޓިންގ ގެ ދާއިރާއިން ފުރަތަމަ ޑިގްރީ ޙާޞިލްކުރައްވާފައެވެ. އަދި، މިޞްރުގައި ކިޔަވަން ހުންނެވި ދުވަސްވަރު އެމެރިކަން ޔުނިވަރސިޓީ އިން ކައިރޯ އިން އެޕްލައިޑް އެކައުންޓިންގއާ ގުޅުންހުރި ކުރު މުއްދަތުގެ ކޯސްތަކެއް ފުރިހަމަކުރައްވާފައިވެއެވެ.